Deanu ođđa guolástannjuolggadus vuolláičállojuvvui – muddendoaimmat leat plánejuvvon luossamáddodagaid beaktilis váfisteapmái
Deanu guolástannjuolggadus boahtte jagiide lea fas lávkki lagabus, go cealkámušmáhcahaga vuođul čakčat ráhkaduvvon guolástannjuolggadus vuolláičállojuvvui bearjadaga 20.12. Oslos. Dásseválddi presideanta mieđihii guolástannjuolggadusa vuolláičállinfápmudusaid duorastaga. Guolástusa ordnema dáfus lea dehálaš, ahte Suomas ja Norggas lea oktasaš guolástannjuolggadus, man mielde Deanus guolástuvvo.
Bearjadaga vuolláičállojuvvon Deanu guolástannjuolggadusa muddendoaimmat leat plánejuvvon máddodagaid gievruma dáfus beaktilin. Luossamáddodagaid heajos dili dihte ovdanbuktojuvvo, ahte luossabivdu muddejuvvo ceahkkálagaid, luossamáddodagaid ealáskahttima ja joga váldooali sierra luossamáddodagaid johtalanáigodagaid mielde. Guolástannjuolggadusa doallá sisttis kritearaid das, mot luossabivdu rahppojuvvo go luossamáddodagat ealáskuvvet. Dasa lassin eará šlájaid go luosa bivdinvejolašvuođat álkiduvvojedje.
Geasset gulaskuddamis leamašan guolástannjuolggadusarvalussii (EMM dieđáhus 30.6.2023) šiehtadallojedje vel čakčat nuppástusat cealkámušmáhcaga vuođul. Luossabivddu suovvama kriteara aiddostahttui dakko bokte, ahte guovtti vahku áigge oktage kritearaid deavdi vahkku reahkká luossabivddu rahpamii. Dás maŋás mánáide dárkkuhuvvon guolástanlobit sáhttet mieđihuvvot Suomas 16 ahkejagi sajis 18 ahkejagi rádjái. Ruoššaluosa oažžu bivdit almmá sierra bivdofidnu eará guollešlájaid bivddu olis fierbme- ja stággogaskaomiiguin báikkiin, mat dasa čujuhuvvojit. Viiddes ruoššaluosa geahpedanbivdofidnuin nubbi oassebealli galgá dollojuvvot fárus fidnu juohke muttus, juos fidnu árvvoštallojuvvo hehttet fuopmášahtti láhkai luosa goargŋuma.
Deanu guolástannjuolggadus ovdána čuovvovaččat riikkabeivviid gieđahallama várás. Ráđđehusa ovdanbuktojupmi lea sáddejuvvon cealkima várás. Cealkináigi nohká 15.1.2024. Ráđđehusa ovdanbuktojupmái gullet maid nuppástusat Deanu guolástansoahpamuša fápmuibidjanláhkii.
Vássán geassi Deanus ii lean oiddolaš luossanáliid ealáskuvvamii, muhto luosaid goargŋunmearit ledje ain vuollegaččat. Suoma ja Norgga oktasaš Deanu luossanáliid dutkanjoavkku álgoárvvoštallama mielde luossanáliin eai lean mearkkat eallinbáhcima buorráneamis mearas. Ovtta mearrajagi luosat gorgŋo Detnui fas uhccán, nu ahte stuorát luosaid oasil dilli ii duođalági mielde buorrán jagi 2024. Ovtta mearrajagi luosaid vátna mearri lea leamaš viidát leavvan fenomena vássán geasi áigge stuorámus oasis Norggas. Dárkilut raporta Deanu luossanáliid dilis fidnejuvvo lagašáiggiid ja raporta almmustahtto maid Luondduriggodatguovddáža fierbmesiidduin.
Liŋkkat:
Ráđđehusa ovdanbuktojumi cealkinjorrosa materiálat Fidnolásas.
Lassidieđut:
Tapio Hakaste, ráđđádalli virgeolmmoš, luondduriggodatossodat, meahccedoalloovttadat, t. 0295 162 152, ovdanamma.sohkanamma@gov.fi
Vesa Ruusila, ovttadaga hoavda, meahccedoalloovttadat, t. 0295 162 051, ovdanamma.sohkanamma@gov.fi
