Hoppa till innehåll
Media

Spiehkastatdilis nuppástusat doarjjavuogádagaide – vielgadasbuvttadeapmái sierradoaimmat

maa- ja metsätalousministeriö
Julkaisuajankohta 21.4.2020 13.26 | Julkaistu suomeksi 23.4.2020 klo 16.21
Dieđáhus

Koronavirusa dagahan spiehkastatdili dihte eanandoalu doarjjavuogádagaide bohtet nuppástusat. Vielgadas- ja oljošattuid šaddadeapmái čujuhuvvojit lasseresurssat. Suopma lea ožžon maiddái lobi vuolidit eartta ja heargebábu siepmaniid ihtingáibádusaid. Dasa lassin Eurohpa kommišuvdna addá vejolašvuođa bajidit gilvindoarjagiid čavčča máksineriid ja geahpedit eanandáluid gohcima.

Vielgadas- ja oljošattuid šaddadeapmái lasseresurssat

Eanan- ja vuovdedoalloministeriija, Maa- ja metsätaloustuottajain Keskusliitto (MTK) ja Svenska lantbruksproducenternas centralförbund (SLC) leat soahpan lasihit lagabui golbma miljovdna euro EU vielgadas- ja oljošattuid buvttadeapmái čadnojuvvon ruhtii. Lasáhus guoská jahkái 2020. Vielgadas- ja oljošattuid EU-ruđa ollislaš mearri stuorru boahttevaš šaddanáigodagas badjel 40 proseantta oktiibuot gitta 9 miljovdna euroi.

- Go lasihit iešbirgema, nannet maiddái biebmovuogádaga fuolahussihkkarvuođa. Dál sohppojuvvon lasseresurssa bokte viggat veahkehit oljo- ja vielgadasšattuid šaddanviidodaga stuorideami juo boahttevaš šaddanáigodagas. Seammás buoridit ruovttueatnamis ráhkaduvvon fuođarvielgadasa ja vielgadasšattuid oažžuma dálážis, eanan- ja vuovdedoalloministtar Jari Leppä gávnnaha.

EU-ruđa bajideami lassin vielgadas- ja oljošattuid gilvineavttuid ovddidit maiddái ovddidanfitnuin, mat álget farga. Geahča: Biebmovirgedoaimmahat: biebmogoallosfitnut Liŋka nuppi siidui

Mannan jagiid leat čalmmustahttán vielgadasšattuid buvttadanmeari lasiheami. Dat lea leamaš okta eanandoallopolitihka mihttomeriin sihke EU dásis ja mis Suomas. Aiddo dál earenoamážit COVID-19 -epidemiija dagahan spiehkkaseaddji dilis, ohccojuvvojit ja geavahuvvojit buot vejolaš doaibmabijut, vai bastet ovddidit álbmotlaš fuolahussihkkarvuođa.

– Min mihttomearrin lea juo guhká leamaš geahpedit vielgadasfuođđariid buktinávdnasiid dárbbu. Dáláš eahpesihkkaris máilmmimárkandilis vielgadasaid dáfus iešbirgema nannen lea ain deháleabbo, ministtar Leppä deattuha.

Mearri mii sirdojuvvo vielgadas- ja oljošattuid ruhtii, geahpeduvvo C-doarjjaguovllu eadnegusaid ja burruid EU-ruđas. C-doarjjaguovllu gusa- ja burrobiergobuvttadeddjiide dát seamma euromearri buhttejuvvo dainna, ahte bajidit álbmotlaš davvi ruovttueallidoarjaga. Vielgadas- ja oljošattuid buvttadeapmái čadnojuvvon ruđa meari sáhttá EU-njuolggadusaid vuođul bajidit, dasgo dáid šattuid gilvinviidodat lea mannan jagiid báhcán čielgasit unnibun go kommišuvdnii almmuhuvvon ng. refereansabuvttadansuorgi, mii lea sullii 170 000 hektára. 2,7 miljovdna euro mii sirdojuvvo, sáhttá váldojuvvot C-doarjjaguovllu gussa- ja burroruđas, daningo dáláš árvalusa mielde máksingelbbolaš eadnegusaid, eadnegussaguigguid, burruid ja vieksáid ovttadatdoarjagat eai njieja sirdima dihte uhcibun, go dán jagi kommišuvdnii almmuhuvvon ng. refereansaovttadatdásit.

Loahpalaš mearrádus EU-ruđa ruhtasirdimis dárkkálmahttojuvvo ja nannejuvvo stáhtaráđi ásahusain golggot- skábmamánus, go dihtet árvalusa dán jagi máksingelbbolaš elliid meriin ja ollašuvvan gilvinviidodagas. Buvttadeapmái čadnojuvvon dárkilut EU-ruđaid doarjjadásit (€/ealli, €/hektára) dárkkálmahttojuvvojit maiddái seamma oktavuođas. EU buvttadeapmái čadnojuvvon bealdošaddoruhta ja gussa- ja burroealliruđa vuosttaš oassi máksojuvvo juovlamánus.

EVM dieđáhus ođđajagimánus 2020 nannejuvvon EU buvttadeapmái čadnojuvvon ruđain Liŋka siidui

Lassedieđut eanan- ja vuovdedoalloministeriijas:
spesiálaáššedovdi Auli Nurmi (EU buvttadeapmái čadnojuvvon doarjja ja doaibmabijuid ruđaidsirdimat), tlf. 0295 162304
spesiálaáššedovdi Pekka Pihamaa (álbmotlaš doarjja), tlf. 0295 162289

Supmii lohpi vuolidit eartta ja heargebábu siepmaniid ihtingáibádusa

Suopma ozai kommišuvnnas spiehkastatlobi vuolidit eartta ja heargebábu sertifiserejuvvon siepmana ihtingáibádusa, daningo earta- ja heargebáhpoeriid ihtimis leat leamaš mannan šaddanáigodaga maŋŋel čuolmmat. Lobi ohcamis dagai álgaga Siemenkauppiaitten yhdistys (sg. Siepmangávpejasaid ovttastus). Kommišuvdna mieđihii Supmii spiehkastatlobi mannan vahkus. Áššái laktáseaddji eanan- ja vuovdedoalloministeriija ásahus boahtá fápmui cuoŋománu 22. beaivve ja dat lea fámus gitta geassemánu 30. beaivvi rádjái.

EVM ásahusas mearriduvvo, ahte Biebmovirgedoaimmahat sáhttá sertifiseret dihto šlájaid vuoliduvvon ihtimiin oktiibuot 130 000 kilo heargebábu ja 240 000 kilo eartta sertifiserejuvvon siepmana. Eriid ihtin galgá leat unnimustá 70 proseantta. Namuhuvvon siepmaneriid sihkarvuođaduođaštusaide galgá merket, ahte dat leat sertifiserejuvvon vuoliduvvon ihtingáibádusain. Dán giđa ožžot vuoliduvvon ihtingáibádusa mielde márkaniidda vel muhtun veardde sertifiserejuvvon eartta ja heargebábu siepmaneriid. Beroštuvvan šaddadeddjiid ávžžuhit čuovvut almmuhusaid ja váldit farggabáliid oktavuođa siepmansuorggi doibmiide ja páhkkenbáikkiide.

Lassedieđut eanan- ja vuovdedoalloministeriijas:
spesiálaáššedovdi Kati Lassi, tlf.  0295 162070

Eurohpa kommišuvdna addá vejolašvuođa bajidit čavčča máksineriid ja geahpedit gohcima

Kommišuvdna lea rievdadan iežas doaibmaváldái gullevaš ásahusaid COVID-19 -epidemiija geažil. Nuppástusat ee. áradit dáluid máksui bidjama. Dat dahkkojuvvo oahpes vugiin nu, ahte bajidit ovdamávssuid ja geahpedit gohcima.

Go bajidit dálonguovllu ovddideami gilvindoarjagiid, bastet máksit dáluide Suomas sullii 70 mij. euro. Dál ruhta sáhttá máksojuvvot árabut, go dalle juos eai livčče rievdadan dili. Doarjagiid máksin eaktuda báikki alde gohcima, mii geahpeduvvo 40 % dahjege 3 prosentii. Maiddái dievasmahtti eavttuid gohcingeatnegasvuohta geahppána beliin. Ásahus sisttisdoallá maiddái eará nuppástusaid, mat váikkuhit muhtun veardde gohcinmeriide.

Kommišuvnna ollašuhttinásahusat:

https://eur-lex.europa.eu/legal-content/FI/TXT/?uri=uriserv:OJ.L_.2020.119.01.0001.01.FIN&toc=OJ:L:2020:119:TOC

https://eur-lex.europa.eu/legal-content/FI/TXT/?uri=uriserv:OJ.L_.2020.119.01.0003.01.FIN&toc=OJ:L:2020:119:TOC

Lassedieđut eanan- ja vuovdedoalloministeriijas:
Ráđđádalli virgeolmmoš Mirja Kiviranta, tlf. 0295 162352