Deanu beaividuvvon guolástannjuolggadus ovdána riikkabeivviide – plánejuvvon guollebivddu muddendoaimmaid ulbmilin nanosmahttit luossanáliid beaktilit
Stáhtaráđđi evttoha Deanu guolástannjuolggadusa 2024–2030 ja dan fápmuibidjanlága dohkkeheami. Guolásteami ordnema dáfus lea dehálaš, ahte Suomas ja Norggas lea oktasaš guolástannjuolggadus, man mielde Deanu bivdet.
Ráđđehusa árvalus Deanu beaividuvvon guolástannjuolggadussan dohkkehuvvui stáhtaráđis 20.2. Árvalussii gullevaš lágain biddjo fápmui guolástannjuolggadus ja eiseválddiid barggut guollebivddu ordnemis ja guollenáliid divššus dárkkálmahttojit.
Norggain juovlamánus vuolláičállon (Eana- ja meahccedoalloministeriija dieđáhus 22.12.2023) Deanu guolástannjuolggadusa guollebivddu muddendoaimmat leat plánejuvvon nu, ahte dat nanosmahttet luossanáliid beaktilit.
Luossanáliid heajos dili dihtii evttohuvvo, ahte luossabivdu muddejuvvo ceahkkálagaid, luossanáliid ealáskahttima ja joga váldooali sierra luossanáliid johtalanáigodagaid mielde. Guolástannjuolggadus sisttisdoallá kritearaid das, mo luossabivdu rahppojuvvo go luossanálit ealáskit. Dasa lassin eará šlájaid go luosa bivdinvejolašvuođat álkiduvvojit. Ovdamearkka dihtii ruoššaluosa bivdu šaddá álkibun.
Addojuvvon cealkámušat čuvvo eanáš árat cealkámušproseassas ovdanbukton oaiviliid. Cealkámušaid vuođul dárkkálmahtte árvalusa ákkastallanteavsttaid.
Ráđđehusa árvalus lea ovddalgihtii dárkkistuvvon Vuoigatvuohtakánslera doaimmahagas, eaige dasa boahtán fuomášuhttimat.
Ráđđehusa árvalusas ávžžuhuvvo, ahte dat vuolggahuvvo vuođđoláhkaváljagotti gieđahallamii.
Mannan geassi ii lean oiddolaš Deanu luossanáliid ealáskeami dáfus. Suoma ja Norgga oktasaš dutkanjoavkku mielde (Luondduriggodatguovddáža dieđáhus 17.1.) ovtta mearrajagi dittit gorgŋo johkii vuot unnán, nuba stuorát luosaid ektui dilli ii buorráneš jagis 2024.
Deanu guollenáliid suvdilis geavaheami ja divššu lassin guolástannjuolggadusa ulbmilin lea ovddidit sámiid eamiálbmotrivttiid ja seailluhit báikkálaš kulturárbevieruid.
”Heajos luossadilis berret smiehttat ođđa vugiid deatnogáttesámiid bivdokultuvrra seailluheapmin ja dasa sáhttá guolástannjuolggadusa spiehkastatlohpi fállat vejolašvuođaid. Maiddái dáid spiehkastatlobiid galgá plánet nu ahte luosat jápmet nu uhcán go vejolaš, mii rahppo ráđđehusa árvalusa ákkastallamiin, lohká ráđđádalli virgeolmmoš Tapio Hakaste.
Liŋkkat:
Ráđđehusa árvalusa materiálat Hankkeet ja säädösvalmistelu -siiddus (suomagillii)
Suoma ja Norgga oktasaš Deanu luossanáliid dutkanjoavkku raportta luossanáliid dilis (suomagillii) (Luke.fi)
Raportta čoahkkáigeassu
Lassedieđut:
Tapio Hakaste, ráđđádalli virgeolmmoš, luondduriggodatossodat, bivdodoalloovttadat, t. 0295 162 152, ovdanamma.sohkanamma@gov.fi
Sonja Falk, ministara sierraveahkki, t. 050 911 4546, ovdanamma.sohkanamma@gov.fi
Vesa Ruusila, ovttadaga hoavda, bivdodoalloovttadat, t, 0295 162 051, ovdanamma.sohkanamma@gov.fi
