Luosat máhccet mearas ovddit áiggiid heajubut – guollebivddu ráhkkanit geahpedit jagi 2021
Deanu luossanáliid ealáskeapmi ii leat ovdánan dego lei ávaštallojuvvon. Gádjaseasanbohtosiid vuođul Detnui gorgŋo mannan gease gođđat dušše badjelaš 14 000 luosa. Dát lea vuollel bealli jagi 2018 luossamearis, mii ii datge nu stuoris lean. Dili dihtii guollebivddu ferte geahpedit ain, vai luossanáliid bastet ealáskahttit. Heajos dilli lea dovddastuvvon stáhtadásis Suomas ja Norggas, man lassin heajos luossajahki lea áicojuvvon báikki alde Deanuleagis. Boahtte gease guollebivddus ráđđádallet báráige Suoma ja Norgga gaskkas.
Suoma ja Norgga oktasaš dutkamušjoavku lea árvvoštallan varas raporttastis, ahte luosaid mearri lea vuollegaš jo dalle, go dat máhccet rittu guvlui. Dutkiid mielas deháleamos luossanáliin guolli ii reahkká olláge bivdui, jus mihttomearrin lea oažžut doarvái duovviid gođđansajiide. Deanu gierasuorggit, Kárášjohka, Iešjohka ja Anárjohka, ja Deanu váldoroggi gokčet sulaid 80 proseantta oppa Deanu veajetbuvttadanguovlluin. Dáidda jogaide máhccan luosain bivdet dábálaččat badjel beali ovdal go dat jovdet gođđansajiide.
Eana- ja meahccedoalloministtar Jari Leppä ádde fuola Deanu luossanáliid dilis.
– Eallinfámolaš luossanálit Deanus leat dehálaš oassi guovllu sámekultuvrras ja vuođđu turisma- ja lustaáigge bivdui. Čovdosiid dillái ohcet ovttas čáhceviidodaga oamasteaddjiiguin, báikkálaš guollebivdiiguin ja fitnodatdoalliiguin. Jus guollebivdu ráddjejuvvo, čoavddus galgá leat dássebealát Suoma ja Norgga ja sierra guollebivdijoavkkuid gaskkas, Leppä deattuha.
Suopma atná maiddái vealtameahttumiin, ahte luossanáliid ealáskeapmi ovddiduvvo olles daid eallingierddu guovllus jogas vutnii ja mearraguvlui. Luossanáliid dili geažil guolebivdit fertejit ráhkkanit dasa, ahte Deanu luosaide galgá boahtte gease addit ovddibu buoret vejolašvuođaid beassat gođđansajiide.
Lassedieđut:
ráđđádalli virgeolmmoš Tapio Hakaste, t. 0295 162 152, tapio.hakaste(at)mmm.fi
ministara sierraveahkki Teppo Säkkinen, t. 050 516 2868, teppo.sakkinen(at)tem.fi
