Boazodoallolága nuppástusat cealkámušaide – dikšun- ja ávkkástallanplánat guohtumiid suvdilis ávkkástallama várás

Boazodoalloláhka evttohuvvo nuppástuhttot. Evttohus láhkanuppástusas lea cealkámušain 9.4. – 30.5.2025. Ráđđehusa evttohusa vuođđun lea eana- ja meahccedoalloministeriija ásahan bargojoavkku ovttamielalaččat dahkan evttohusain.

Evttohuvvon njuolggadusaid mielde bálgosat galggašedje gárvvistit boazoguohtumiid dikšun- ja ávkkástallanplánat. Plánema mihttomearrin lea gávdnat guđege guvlui buoremusat heivvolaš ja guhkes áigegaskka geavadagaid, maiguin sáhttá doarjut guohtumiid suvdilis ávkkástallama eavttuid. 
Guohtun golaha jeageleatnamiid, muhto maiddái veahkeha duottarluonddu ja dasa vuogáiduvvan šlájaid seailut liegganeaddji dálkkádagas, ovdamearkan dustemiin miesttaluvvama ja duoddariid meahcceluvvama. Boazoguohtumiid anihahttivuhtii, buvttadannákcii ja biologalaš máŋggahámatvuhtii čuhcet earálágan nuppástusdeaddagat dego dálkkádatrievdan ja eará eanaávkkástallan. Plánat galget leat ođđa reaidu, maiguin bálgosat sáhttet bealisteaset reageret eará nuppástusdahkkiid oktasašváikkuhussii.

Boazoguohtumiid dikšun- ja ávkkástallanplánaid atnui váldima leat evttohan maiddái ovddit dutkanfidnuin, mat leat guoskan boazoguohtumiid ja maiddái stuorámus lobálaš boazologuid ásaheami válmmaštallan bargojoavkkus ja Boazodoalu boahttevuođabargojoavkkus. Plánaid gárvvisteami leat testen mannan jagi ollašuhtton pilohttafidnus.

Boazomeriid hálddašeapmái ođđa vuogit 
Ođastusas maiddái čielggasmahttet bohccuid meari bákkolaš geahpedeami guoskevaš bálgosa mearrádusdahkama ja mearrádusaid ollašuhttima dalle, go bohccuid mearri manná badjel stuorámus lobálaš boazomeari dahje áitá mannat badjel. Boazoeaiggádiid vejolašvuođa ávkkástallat geahpedeamis guođđán bohccuid estojuvvošii ee. hálddahuslaš čuovvunmávssu ásahemiin.

Boazomeriid hálddašeami beavttálmahttin ovddidivččii guohtumiid suvdilis ávkkástallama ja geahpedivččii eanemusboazomeriid badjelmannama ja bálgosa buot boazoeaiggádiidda šaddan vahágiid dego riskka doarjagiid massimis. 
Hálddahus dahkko njuovžilabbon
Lassin boazodoalloláhkii dahkkojuvvošedje muhtun nuppástusat, mat dahket boazodoalu hálddahusa njuovžilabbon ja nannejit ollesáigásaš boazodoalu sajádaga.

Lágas áigot čielggasmahttit, ahte dan mihttomearrin lea boazodoalu hárjeheami eavttuid sihke sápmelaččaid gielalaš ja kultuvrralaš rivttiid dorvvasteapmi.
Eana- ja meahccedoalloministeriija našuvnnalaš doarjagiin addojuvvon láhkii sihke boazodoalu ja luondduealáhusaid ráhkadusdoarjagiin addojuvvon láhkii dahkkojuvvošedje nuppástusat, mat laktásit ođastussii.

Lassedieđut: 
Láhkaásahanráđđi Johanna Wallius, ovdanamma.sohkanamma@gov.fi, t. 0295 162 244
Ovttadaga oaivámuš Anna-Leena Miettinen, ovdanamma.sohkanamma @gov.fi, t. 0295 162 409
Liŋkkat
Cealkámušmateriála ja bargojoavkku raporttat Lausunto.fi-bálvalusas (suomagillii)
Láhkaásahanfidnu gárvvistanáššegirjjit leat láhkaásahanfidnu (MMM027:00/2024) fidnosiidduin (suomagillii).