Hámus Deanu boahtte bivdobaji guolástanmearrádusain lea gulaskuddamiin
Deanu boahtte geasi guolástanráddjehusain eará šlájaid go luosa oasil lea ožžojuvvon válmmašin beavdegirjehámus Suoma ja Norgga gaskasaš ráđđádallamiin. Hápmosa birra bivdojuvvojit cealkámušat 24.3. rádjai.
Suopma ja Norga leat ráđđádallan boahtte bivdobaji guolástanmearrádusain eará šlájaid go luosa oasil. Luossabivddu ráddjema váikkuhusat figgojuvvojit láivuduvvot nu, ahte lasihuvvojit vejolašvuođat eará šlájaid guolásteapmái. Hápmosis mátkkálaččaide lea fállun ovddit jagi láhkai lohpi, mainna oažžu guolástit gehppes dolgevuoggabivdoneavvuin eará šlájaid go luosa, mielde maiddái guvžá. Dan lassin evttohuvvo, ahte guvžžá bivdu lea lobálaš borgemánu 20 beaivve rádjai dasa sierra ráddjejuvvon báikkiin, gos eai loahppagease eará šlájat loavtte.
Báikegottis ássi guolásteaddjit oččošedje šlivgut gáttis ja fatnasis stákkuin. Deanu deháleamos guoikkaide, Badje- ja Vuollegeavgŋái, boađášii buotlágan stággobivddu guoski ráfáidahttinguovlu luosa mielsállaša geahpedeami várás.
Ráđđádallanbohtosa mieldásaš beavdegirjehápmosis sáhttá addit cealkámušaid 24.3.2023 rádjai. Beavdegirjji lea dárkkuhus vuollái čállit cuoŋománu álggu rádjai, vuoi áiggi dássásaš guolástanmearrádusat Detnui bohtet doarvái áiggil fápmui.
Luossabivddu guoski ráđđádallamiid dán jagi guolástanmearrádusaid oasil lea ferten čađahit riikkabeivviid áigetávvaliid geažil eará láhkai go dábálaččat jo čakčat 2022, danin go luossabivdomearrádusaid galggai ásahit lága dásis. Dásseválddi presideanta nannii 3.3.2023 lága luossabivddu mearreáigásaš gieldimis Deanu čázádagas. 1.5.2023 fápmui boahtti lága mielde luossa lea ráfáidahtton ja luossabivdui dárkkuhuvvon bivdobiergasat leat gildojuvvon jagi loahpa rádjai.
Cealkámušbivdda ja dasa laktáseaddji materiála gávdnojit stáhtaráđi prošeaktaruvtto-bálvalusas ja maiddái eana- ja meahccedoalloministeriija neahttasiidduin.
Lassidieđut eana- ja meahccedoalloministeriijas:
Vesa Ruusila, bivdodoalloráđđeolmmoš, t. 02951 62051, vesa.ruusila(at)gov.fi
Tapio Hakaste, ráđđádalli virgeolmmoš, t. 02951 62152, tapio.hakaste(at)gov.fi
